بسم الله الرحمن الرحيم
بندر بن سرور
عرفه الشعر النبطي بالإبداع في الصنعة
وذكاء النظم
وجودة المعاني وجدتها
لقد أعيا الشعراء بشعره
فهو يقول:
أنا ليا مني نويت افتل البيت
فتلت والشعار ماينقضونه
وإليكم شيأ من إبداعه:
(لاتسقط شرفها)
الله من شي بحالي نحفها من مالجى بالقلب حالي نحيفه
من كثر ماتكتم تزايد تلفها بين كداها بالعروق الصخيفه
كم واحد له حاجة ماصرفها
يصد عن صرافها لايضيفه
يخاف لايقضب نديم طرفها
قلبه صدى واطراف جسمه نظيفه
والله خلق بيض الذلول وعسفها
للي يبي المنهاج مثل القطيفه
والفضل للي مدها ماقصفها
وانهج من الدار المحل للمريفه
وانصحك ياللي غرته ماعرفها
شيب تشيب مايحول رديفه
رديفها يركض ويركز هدفها
وقت يقص العظم من حد سيفه
وان جتبك الدنيا وجتبك صدفها
لاتعتزي بأهل النفوس الضعيفه
وأنصحك نفسك لاتسقط شرفها
ترى بعض بيض المجالس مجيفه
(ياسخيف الذرعان)
*ياسخيف الذرعان مانيب مرجوج
رجتني الأيام غدر وحيلة
*يابنت لولا اللي على تاسع الفوج
تركت نجد وعزوتي والقبيلة
*لاشك حاديني على نجد هادوج
مسقي الفيافي لين يدرج مسيله
*تركي ليا من الليالي غدن عوج
حمله عتيبة كلها ماتشيله
*يرسي كما ترسي البواخر على الموج
ومنين ماهب الهوى يرتكي له
*مادام تركي حي ماودي أدوج
وان غاب غبت من الرجوم الطويلة
(في عزة النفس)
*أنا الذي ما ابدي على الناس سري
من خوف سودان الوجي تحكي به
*أصبر على ظيم الدهر والتعري
من شان من يرضى علي الغليبة
*وابعد مجالي عن عيال التزري
من لاهوى قلبي دواه المغيبه
*وأخاف لي من مجلس ما يذري
في جانبه بوم حساسة صليبة
*وسوالف مابين بحث وتحري
يجرح فؤادي عيت وابتلي به
*يرضيني المقسوم خيري وشري
سبحان من لا تعلم الناس غيبه
*أحد على ربعه يحب التحري
للشر بلاس وخيره بجيبه
*هذاك يالربع انا منه متبري
لو عظني ناب الدهر ما انتخي به
*من خوف يضحك لي وهو يستغري
يفتل حبال السو مايندري به
*يفرح علي بكل شي يمري
وان شاف يمي خير عني نهيبه